Është mbajtur sot në GJKKO seanca e radhës për dosjen “Sterilizimi” me të pandehur dhe ish-ministrin e Shëndetësisë, Ilir Beqaj.
Ilir Beqaj ka dëshmuar në seancën gjyqsore ku ka kërkuar dhe pafajsinë teksa është i akuzuar për miratim të kontratës koncensionare të sterilizimit në kundërshtim me ligjin. Ndër të tjera ish-ministri është ankuar për mënyrën sesi dosja prezantohet në publik referuar frazës “Ilir Beqaj dhe të tjerët”, teksa është shprehur se ai është i fundit në kërkesën e gjykatës.
Sakaq, Beqaj ka ngritur pretendime dhe mbi caktimin e avokatit mbrojtës nga Dhoma e Avokatisë teksa ka kërkuar sqarime të mëtejshme se kur avokati i caktuar është njohur me dosjen e tij, referuar faktit se ky i fundit kishte shprehur gadishmërinë për ta mbrojtur Beqajn në gjykatë.
Ilir Beqaj: Sa i takon komunikimit publik, kjo nuk është çështja e Sterilizimit, as kontratë e Sterilizimit dhe as koncesion i Sterilizimit. Kjo nuk përmendet as në titullin e kontratës. Sterilizimi është vetëm një nga 6 komponentët e kontratës. Kjo është çështje e instrumenteve kirurgjikale.
E dyta, i referohen dosjes “Ilir Beqaj dhe të tjerët”. Unë jam i fundit në kërkesën e gjykatës. Pse duhet të thuhet “Ilir Beqaj dhe të tjerët”. Këta të tjerët i bie sikur janë këtu prej meje. Unë synoj pafajësinë dhe kjo është nominale.
Së treti, e kam për avokatin Maks Haxhia, si drejtues të Dhomës së Avokatisë. Avokati kryesisht i caktuar nga gjykata për dy javë tha se është i gatshëm për mbrojtjen, pa e lexuar dhe pa më takuar mua ndonjëherë.
Unë i kam parë edhe komentet e Maks Haxhiajt për SPAK-un.
Do të doja të informohem nga gjykata, kur ka ardhur avokati kryesisht të njihet me dosjen time?
Vendimi i datës 23.1.25 përmban të dhëna dhe informacione të rreme. Procedimi ndaj meje nuk duhet të kishte nisur, pasi i njëjti fakt penal është hetuar nga Prokuroria e Tiranës dhe ajo prokurori e ka pushuar çështjen.
Në vendimin e gjyqtares paraprake përmendet 15 herë neni i kodit penal, që flet për armëmbajtjen pa leje. Se ç’lidhje kam unë me këtë, nuk e di./e.s
