Policia e Durrësit ka identifikuar dhe ka shpallur ne kërkim dy persona në lidhje me atentatin ndaj 29 vjeçarit Ermir Dedja, krim i ndodhur në lagjen nr.8 të qytetit bregdetar.
Burime nga grupi hetimor bëjnë me dije se hetimet po ecin në rrugën e duhur drejt zbardhjes së ekzekutimit mafioz pak pas mesnatës së të hënës (20 Maj) dhe identifikimin e personave të përfshirë në atentat.
Raportohet se dy personat e shpallur në kërkim dyshohet se kanë ndihmuar autorët për krijimin e infrastrukturës për eliminimin e Ermir Dedjas.
Sipas burimeve, ata kanë siguruar automjetin dhe bashkëpunuan ngushtë me ekzekutorët, të cilët mendohet të kenë qenë dy persona.
Ndërkohe, ekspertët e kriminalistikës provat e gjetura në automjetin tip Seat të përdorur nga atentatorët, që u gjet i djegur në Gërdec, i kanë dërguar në laboratorin e kriminalistikës dhe presin rezultatet e analizave.
Për shkak të angazhimit të 29-vjeçarit në aktivitete të ndryshme kriminale përgjatë viteve të fundit, policia ka ngritur disa pista hetimi për vrasjen e Ermir Dedjas, personazh i njohur për policinë.
Ermir Dedja u qëllua për vdekje në Durrës teksa ndodhej nën shoqërinë e dy personave të tjerë. Ai mori një plumb në gjoks që i shkaktoi vdekjen./e.s
