Presidenti i FIFA-s, Gianni Infantino, ka lënë të hapur mundësinë që Cristiano Ronaldo të marrë pjesë në Kupën e Botës për Klube që zhvillohet këtë verë në Shtetet e Bashkuara, shkruan A2 CNN. Edhe pse skuadra e tij aktuale, Al-Nassr, nuk arriti të kualifikohet për turneun me 32 ekipe, Infantino zbuloi se “ka diskutime” për përfshirjen e portugezit në këtë kompeticion.
Në një intervistë me YouTuber-in e njohur IShowSpeed, Infantino foli fillimisht për Lionel Messin, i cili do të luajë me Inter Miami në ndeshjen hapëse më 14 qershor. Më pas ai shtoi: “Dhe ndoshta Ronaldo do të luajë gjithashtu për ndonjë ekip në Kupën e Botës për Klube. Ka diskutime me disa klube”.
Kontrata e Ronaldos me Al-Nassr përfundon më 30 qershor, ndërsa FIFA ka hapur një dritare shtesë transferimesh nga 1 deri më 10 qershor për të mundësuar afrime për turneun.
Sipas gazetës spanjolle Marca, një klub brazilian i paidentifikuar ka bërë ofertë për Ronaldon. Një nga kandidatët mund të jetë Botafogo, një nga katër skuadrat braziliane të kualifikuara. Trajneri i tyre, Renato Paiva, nuk e mohoi interesin dhe tha: “Një yll si Ronaldo nuk refuzohet”.
Ronaldo, pesë herë fitues i Topit të Artë, ka fituar katër herë Ligën e Kampionëve me Real Madridin dhe mbetet një nga golashënuesit më të frikshëm, pavarësisht moshës 40-vjeçare.
Me skuadra të mëdha si Real Madrid, Juventus, Chelsea dhe Manchester City në turne, pjesëmarrja e Ronaldos do ta rriste më tej prestigjin e këtij edicioni të ri të Kupës së Botës për Klube. m.p.
