Presidenti amerikan, Donald Trump, ka ndezur sërish skenën ndërkombëtare me një deklaratë të fortë ndaj presidentit rus Vladimir Putin. Në një postim në platformën e tij Truth Social, Trump ka deklaruar se “Putini po luan me zjarrin” dhe i kujtoi homologut të tij rus se “nëse nuk do të ishte për mua, Rusisë tashmë do t’i kishin ndodhur gjëra shumë të këqija.”
Kjo deklaratë vjen në një moment të nxehtë diplomatik dhe ushtarak, ku tensionet në rajon janë në rritje. Ndërkohë, autoritetet ukrainase po i kërkojnë ish-presidentit amerikan që të marrë një pozicion të qartë:
“Ose embargo ndaj Rusisë, ose tërheqje nga negociatat.”
Kjo kërkesë është një sinjal i qartë se Kievi kërkon veprime konkrete dhe jo vetëm deklarata të ashpra nga figurat e rëndësishme ndërkombëtare.
Ndërkohë, kancelari i ri gjerman, Friedrich Merz, ka folur me tone të ashpra duke theksuar se “Putini nuk e do paqen” dhe se “është e domosdoshme të mbrohemi nga kërcënimet”.
Ai ka bërë thirrje për një qëndrim më të ashpër të Evropës ndaj Rusisë dhe ka lënë të hapur mundësinë për mbështetje ushtarake më të thelluar ndaj Ukrainës.
Por kërcënimet nuk kanë vonuar të vijnë nga Moska. Një zëdhënës i Ministrisë së Jashtme ruse ka deklaruar se “nëse Gjermania do të furnizojë me raketa Taurus Ukrainën, atëherë Berlini do të përfundojë në të njëjtën gropë si Kievi.”
Kjo deklaratë e fortë është parë si një përshkallëzim i rrezikshëm i retorikës ruse dhe një paralajmërim ndaj çdo shteti që mund të përfshihet drejtpërdrejt në konflikt, raporton ‘La Repubblica’
Situata mbetet tepër e tensionuar, ndërsa zhvillimet e ardhshme do të varen shumë nga qëndrimet që do të mbajnë SHBA, Gjermania dhe vetë udhëheqja ukrainase. Në këtë klimë shpërthyese politike dhe ushtarake, çdo fjalë peshon rëndë – dhe çdo veprim mund të ndryshojë rrjedhën e ngjarjeve në mënyrë dramatike. m.p.
