Një tornado e fuqishme ka goditur jugun e Kilit në mbrëmjen e 25 majit, duke shkaktuar dëme të konsiderueshme në një zonë të gjerë të vendit. Stuhia e fortë, me shpejtësi të lëvizjes nga 138 deri në 187 kilometra në orë, ka shkaktuar panik dhe ka lënë pas pasoja të rënda.
Sipas raporteve zyrtare, 19 persona kanë pësuar lëndime të ndryshme gjatë kalimit të tornados, ndërsa mijëra familje janë përballur me mungesë të energjisë elektrike. Mbi 13,000 shtëpi kanë mbetur pa drita, por deri tani është rikthyer energjia elektrike për rreth 85% të tyre. Megjithatë, rreth 5,000 banesa vazhdojnë të jenë pa energji, duke krijuar vështirësi për banorët e zonave të prekura.
Autoritetet kanë mobilizuar ushtrinë dhe ekipet e emergjencës për të ofruar ndihmë dhe për të ndihmuar në pastrimin e rrënojave dhe rimëkëmbjen e zonave të dëmtuara. Punonjësit e shërbimeve të emergjencës janë në terren për të evakuuar banorët e zonave më të rrezikuara dhe për të siguruar furnizimin me nevoja bazë.
Meteorologët paralajmërojnë se moti i keq mund të vazhdojë edhe në ditët në vijim, prandaj banorët e jugut të Kilit janë këshilluar të jenë të kujdesshëm dhe të ndjekin udhëzimet e autoriteteve lokale./e.t
