Gjykata e Posaçme dënoi me 1 vit burg drejtoreshën Deborah Keçi, për çështjen 5D. Dënimin me burg gjykata ia konvertoi në 16 muaj shërbim prove. Keçi u gjet fajtore për akuzen e shklejes së barazisë me tendera. Gjithashtu i hiqet e drejta të mbajë funksione publike për 5 vite.
Teuta Guri dënohet me 9 muaj burg, përfundimisht 6 muaj. Vendimi pezullohet dhe zëvendësohet me punë në interes publik, pa shpërblim, 60 orë, brenda 6 muajsh. Renaldo Gjerasi dënohet me 9 muaj burgim, përfundimisht 6 muaj burg. Pezullim i dënimit me burg dhe zëvendësim me 60 orë punë në interes publik brenda 6 muajsh. Etion Mera dënohet me 9 muaj burg, përfundimisht me 6 muaj burgim, pezullim i dënimit dhe zëvendësim me 60 orë punë në interes publik, brenda 6 muajsh.
Nga hetimet e kryera nga SPAK e pandehura Deborah Keçi në cilësinë e titullarit të autoritetit kontraktor, Klubi Sportiv Tirana, institucion në varësi të Bashkisë Tiranë, në bashkëpunim me të pandehurit Teuta Guri, Jetjon Mera dhe Rejnaldo Gjerazi, në cilësinë e anëtarëve të KVO kanë krijuar për operatorin ekonomik “5D Konstruksion” sh.p.k avantazhe dhe privilegje të padrejta në procedurën e prokurimit me objekt rikonstruksionin e palestrës së mundjes, tender i zhvilluar në dhjetor të vitit 2020.
Sakaq një tjetër proces sipas procesdurës së zakonshme po kryhet ndaj dosjes “5D”. Kërkesën e katër të akuzuarve për t’u veçuar nga pjesa tjetër e grupit të të arrestuarve për shkak të veprave penale, trupa e gjykimit e rrëzoi, duke vendosur qe i gjithë grupi të gjykohet së bashku në një proces të vetëm.
Ndaj tre ish drejtoreve te Bashkisë Tiranë Redi Molla, Taulant Tusha, Mariglen Qato si dhe Enton Punavija, Julian Zanaj, Albano Janku dhe Nestor Muhametllari do të nisë gjykimi në themel. Më herët, trupa gjykuese rrëzoi kërkesën e grupit për tu gjykuar me procedurën e shkurtuar.
Ish-drejtorët e Bashkisë Tiranë u arrestuan në muajin mars të vitit 2024 me urdhër të Prokurorisë së Posaccme, në kuadër të hetimeve për dosjen “5D”. Sipas hetimeve, bëhet fjale për të paktën 11 procedura tenderimi në shkelje te ligjit ne harkun kohorë të 6 viteve, nga 2016 deri vitin 2022./E.T
