Në jetë takohemi me shumë njerëz: disa na frymëzojnë, disa na qetësojnë, e disa të tjerë na lodhin emocionalisht, pa bërë asgjë të dukshme. Këta të fundit janë shpesh individë me sjellje toksike – njerëz që përhapin energji negative dhe krijojnë tension kudo që shkojnë. Por si i dallojmë?
Të njohësh tiparet e një personi toksik është hapi i parë. Hapi i dytë është vendosja e kufijve të shëndetshëm. Nuk është egoizëm të mbrosh veten nga njerëz që të thithin energjinë dhe të frenojnë zhvillimin. Jetën duhet ta ndajmë me ata që na motivojnë, na respektojnë dhe na ndihmojnë të rritemi, jo me ata që na zvarritin në errësirën e tyre.
Ja disa nga tiparet më të zakonshme të një personi toksik dhe negativ:
Kritikon vazhdimisht
Personi toksik rrallë e sheh të mirën te të tjerët. Ai kritikon në mënyrë të ashpër, jo për të ndihmuar, por për të ulur vlerën e të tjerëve. Për të, asgjë nuk është mjaftueshëm mirë – as suksesi yt, as përpjekja jote.
Luajnë viktimën
Gjithmonë janë “viktima” e çdo situate. Ata nuk marrin përgjegjësi për gabimet e tyre dhe preferojnë të fajësojnë të tjerët për gjithçka që shkon keq në jetën e tyre.
Kanë energji jo të mirë
Pas një bisede me ta, ndihesh i lodhur, i zbrazët dhe pa dëshirë. Edhe pse nuk kanë thënë asgjë të keqe hapur, praninë e tyre e ndjen si barrë të padukshme.
Gëzohen me dështimet e të tjerëve
Kur të tjerët përballen me vështirësi, ata shfaqin një kënaqësi të fshehtë. Ata nuk dinë të ndajnë gëzimin e të tjerëve, por nëse diçka keqe ndodh, befas bëhen shumë të interesuar.
Manipulojnë dhe kontrollojnë
Ata përdorin fajin, frikën apo heshtjen për të ushtruar kontroll. E kthejnë çdo bisedë në mënyrë që të ndihesh ti fajtor, edhe kur nuk ke bërë asgjë gabim.
Negativizëm i pandalshëm
Çfarëdo që të ndodhë, ata e shohin në mënyrën më të errët. I sheh gjithmonë të ankojnë, të parashikojnë më të keqen dhe të dyshojnë në çdo mundësi të mirë./E.Ç
