Kryeministri izraelit Benjamin Netanyahu deklaroi ditën e sotme se një sulm ajror i kohëve të fundit vrau Mohammed Sinëar, udhëheqësin de facto të pakapshëm të Hamasit në Gaza, i fundit në një seri vrasjesh që i kanë dhënë një goditje serioze drejtuesve të grupit, por që ende nuk e kanë thyer kontrollin e tij mbi pushtetin.
Sinëar është vëllai i ish-liderit të Hamasit, Yahya Sinëar, i cili u vra nga ushtria izraelite në jug të Gazës në tetor.
Netanyahu e bëri njoftimin gjatë një fjalimi në Knesset, parlamentin e Izraelit, ndërsa vendi shënoi 600 ditë që nga sulmet e Hamasit më 7 tetor 2023.
“Ne e ndryshuam fytyrën e Lindjes së Mesme, i shtymë terroristët nga territoret tona, hymë në Rripin e Gazës me forcë, eliminuam dhjetëra mijëra terroristë, eliminuam (Mohammad) Deif, (Ismail) Haniyeh, Yahya Sinëar dhe Mohammed Sinëar”, u tha ai ligjvënësve.
Forcat Mbrojtëse të Izraelit (IDF) kryen një sulm masiv në Spitalin Evropian në Khan Younis më 13 maj – një ditë pasi Hamasi liroi ushtarin izraelito-amerikan Edan Alexander.
Në atë kohë, IDF tha se kishte goditur “terroristët e Hamasit në një qendër komande dhe kontrolli” në infrastrukturën nëntokësore në spital. Një zyrtar i lartë izraelit dhe dy burime të njohura me çështjen i thanë CNN në atë kohë se sulmi kishte në shënjestër Mohammed Sinëar.
Ministria palestineze e shëndetësisë në Gaza tha në atë kohë se sulmi vrau disa dhjetëra njerëz dhe plagosi dhjetëra të tjerë.
Hamasi kishte hedhur poshtë pretendimet për vdekjen e Sinëar në atë kohë, duke thënë në një deklaratë se vetëm ai është “i autorizuar të konfirmojë ose mohojë atë që është publikuar”.
Vdekja e Sinëar do ta privonte Hamasin nga një komandant i aftë dhe i vendosur. Por shumë analistë thonë se kjo nuk do ta afrojë fundin e konfliktit. Madje mund t’i ndërlikojë negociatat me Izraelin nëse nuk del një udhëheqës i ri dhe ndërmjetësit e Hamasit mbeten pa një bashkëbisedues të Hamasit brenda Gazës.
Zyrtarët izraelitë e konsideronin Mohammed Sinëarin po aq të ashpër sa vëllai i tij, Yahya, por shumë më me përvojë ushtarake. Sipas IDF-së, ai komandoi Brigadën Khan Younis të grupit deri në vitin 2016.
Që nga fillimi i luftës, ai ka mbetur kryesisht i fshehur, së bashku me shumë nga udhëheqësit e lartë të Hamasit në Gaza. Në dhjetor 2023, IDF publikoi një video të asaj që tha se ishte Mohammed Sinëar duke kaluar me makinë nëpër një tunel në Gaza. Në shkurt 2024, IDF tha se kishte gjetur zyrën e tij në Khan Younis perëndimor. m.p.
