Presidenti francez Emmanuel Macron tha ditën e sotme se përçarja midis dy superfuqive, Shteteve të Bashkuara dhe Kinës, është rreziku kryesor me të cilin përballet aktualisht bota, ndërsa theksoi nevojën për ndërtimin e koalicioneve të reja midis Parisit dhe partnerëve në Indo-Paqësor.
Macron po viziton rajonin ndërsa Franca dhe Bashkimi Evropian synojnë të forcojnë lidhjet e tyre tregtare në Azi për të kompensuar pasigurinë mbi masat gjithëpërfshirëse të tarifave globale të Presidentit të SHBA-së, Donald Trump.
“Do të jem i qartë, Franca është një mike dhe aleate e Shteteve të Bashkuara, dhe është një mike, dhe ne bashkëpunojmë edhe nëse ndonjëherë nuk pajtohemi dhe konkurrojmë me Kinën”, tha Macron për Reuters, i cili po fliste në Dialogun Shangri-La, forumin kryesor të mbrojtjes të Azisë, së bashku me një vizitë shtetërore dy-ditore në Singapor.
“Duhet të zgjidhni një anë. Nëse e bëjmë këtë, do ta shkatërrojmë rendin global dhe do të shkatërrojmë në mënyrë metodike të gjitha institucionet që krijuam pas Luftës së Dytë Botërore për të ruajtur paqen dhe për të pasur bashkëpunim në shëndetësi, klimë, të drejtat e njeriut e kështu me radhë”, shtoi Macron.
Presidenti francez tha se Azia dhe Evropa kanë një interes të përbashkët në parandalimin e shpërbërjes së rendit global.
“Koha për mosangazhim padyshim ka kaluar, por koha për koalicione veprimi ka ardhur dhe kërkon që vendet e afta për të vepruar së bashku t’i japin vetes të gjitha mjetet për ta bërë këtë”, tha Macron.
Macron po ndjek udhëheqësit e Kinës, Japonisë dhe vendeve të tjera evropiane në vizitat e tyre në rajon në javët e fundit, në një shenjë të rëndësisë strategjike të Azisë Juglindore mes pasigurive mbi zinxhirët e furnizimit dhe tregtinë globale.
Udhëheqësi francez paralajmëroi gjithashtu se nëse Shtetet e Bashkuara dhe Evropa nuk do të ishin në gjendje t’i jepnin fund luftës së Rusisë në Ukrainë, kjo do të ndikonte edhe në besueshmërinë e tyre në rajonin Indo-Paqësor.
“Nëse Shtetet e Bashkuara të Amerikës dhe evropianët nuk janë në gjendje ta zgjidhin krizën e Ukrainës në një afat të shkurtër, mendoj se besueshmëria e SHBA-së dhe Evropës për të zgjidhur çdo krizë tjetër në këtë rajon do të jetë shumë e ulët”, tha ai. m.p.
