Dua Lipa mahnit italianët me një koncert spektakolar në Milano. Në një spektakël që zgjati mbi një orë e gjysmë, ajo arriti të përziejë shkëlqimin e një ylli botëror me sjelljen e një vajze të thjeshtë, duke krijuar një atmosferë të papërsëritshme mes saj dhe 70 mijë spektatorëve në hipodromin La Maura.
Që nga “Training Season” e deri te finalja me “Don’t Start Now” dhe “Houdini”, çdo këngë u shoqërua me koreografi të detajuara, ndërrime të shumta veshjesh (pesë gjithsej) dhe efekte piroteknike.
Moment i veçantë për publikun ishte kur Dua Lipa interpretoi hitin legjendar të Raffaella Carrà “A far l’amore comincia tu”, me gjithë sharmin e gjesteve ikonike të legjendës së artit italian.
Në kulmin e koncertit, ajo zbriti nga skena për të përshëndetur fansat nga afër, duke ndarë përqafime, duke bërë selfie dhe duke i dhënë mikrofonin fansave për të folur. Vokalet live dhe prezenca skenike e saj treguan se ky ishte më shumë se një koncert, ishte një festë e muzikës, energjisë dhe lidhjes së sinqertë me publikun.
Dua Lipa i dha spektaklit një shpirt të viteve ’80, por me një freski bashkëkohore, duke dëshmuar edhe një herë pse ajo është një nga artistet më të mëdha të skenës pop ndërkombëtare./e.t
