Rreth 14.1% e të rriturve që pinë aktualisht duhan në Shtetet e Bashkuara vuajnë nga një lloj aftësie e kufizuar, sipas një studimi të fundit të publikuar në revistën shkencore Tobacco Control. Ky është studimi i parë i këtij lloji që analizon lidhjen mes statusit të duhanpirjes dhe përhapjes së aftësive të kufizuara, të ndara sipas gjinisë, racës dhe etnisë. Studiuesit përdorën të dhëna nga Anketa Kombëtare e Shëndetit (NHIS) për periudhën 2019–2023, me një mostër përfaqësuese prej rreth 150 mijë individësh. Krahasuar me mosduhanpirësit, personat që pinë apo kanë pirë duhan shfaqin përqindje më të larta të kufizimeve në funksione jetësore si shikimi, dëgjimi, lëvizshmëria dhe funksionet njohëse, me një prevalencë 2 deri në 2.4 herë më të lartë. Gratë që pinë duhan rezultojnë më të prekura nga aftësitë e kufizuara se burrat: 16.5% e tyre raportuan një formë kufizimi krahasuar me 12.1% të burrave. Ndërkohë, analizat sipas etnisë treguan dallime të theksuara: 19% e duhanpirësve jo-hispanikë kishin një aftësi të kufizuar, krahasuar me 11% të duhanpirësve hispanikë. Autorët theksojnë rëndësinë e këtyre të dhënave për hartimin e politikave shëndetësore më të targetuara. “Të kesh informacion të përditësuar mbi aftësitë e kufizuara tek të rriturit që pinë duhan mund të ndihmojë profesionistët e shëndetit publik të krijojnë ndërhyrje më efektive, të përshtatura për nevojat e këtyre grupeve,” thuhet në studim.
Ky publikim vjen si pjesë e serisë “Big Number” të The Washington Post, që synon të sjellë në vëmendje ndikimin e statistikave mbi çështje të rëndësishme shëndetësore.
1 në 7 të rritur që pinë duhan në SHBA kanë një aftësi të kufizuar
