Ushtria izraelite thotë se ka goditur një numër objektivash në të gjithë Iranin sot. Në një përditësim në mediat sociale, Forcat e Mbrojtjes së Izraelit thonë se më shumë se 50 avionë luftarakë të Forcave Ajrore Izraelite kanë goditur objektiva ushtarake në Teheran.
Në deklaratën e IDF-së thuhet se gjatë një “serie sulmesh të kohëve të fundit”, avionët luftarakë goditën “qendrat e komandës ushtarake”.
“Vendet e goditura përfshinin vende prodhimi raketash dhe radarësh, si dhe infrastrukturën e magazinimit të raketave në Teheran”, thuhet në deklaratë, përcjell A2 CNN.
Ushtria izraelite po e godet Teheranin me “forcë të paparë”, thotë ministri i mbrojtjes i vendit, ndërsa gjyqësori iranian konfirmon se burgu Evin i qytetit është goditur.
Televizioni shtetëror iranian raporton se rreth 500 njerëz janë vrarë që nga sulmi i Izraelit ndaj Iranit më 13 qershor, duke cituar ministrinë e shëndetësisë të vendit, ndërsa më shumë se 3,000 njerëz janë plagosur, shkruan A2 CNN.
Ndërkohë presidenti amerikan Donald Trump ka bërë thirrje që çmimet e naftës të mbahen të ulëta në një postim në rrjetet sociale, duke reaguar ndaj bisedimeve për mbylljen e Ngushticës së Hormuzit nga Irani .
“Mbajini çmimet e naftës ulët! Po ju vëzhgoj, mos luani me duart e armikut” shkruan ai në një postim në platformën e tij Truth Social.
Ngushtica e Hormuzit është një rrugë detare që lidh Gjirin e pasur me naftë me Oqeanin Indian , përmes të cilit kalojnë çdo ditë afërsisht 20% e furnizimeve botërore me naftë. m.p.
