Nga ishulli francez pa makina te deti kristalor i Formenterës, te sallatat greke të Folegandros për t’u shijuar në një fshat peshkimi. Dhe pastaj udhëtimet për të zbuluar shpellat dhe plazhet më të bukura në Portugali. Po ju tregojmë disa nga destinacionet bregdetare në Evropë që duhet t’i zbuloni patjetër këtë verë.
Në Spanjë do të gjeni argëtim dhe perëndime dielli marramendëse në far; ndërsa në Lagos mënyra më e mirë për të vizituar të gjitha plazhet më karakteristike është të merrni me qira një makinë. Nëse ju pëlqen çiklizmi, zgjidhni ishujt francezë të Bréhat ose edhe Folegandros, të cilët mund t’ju japin përvojën e pushimeve romantike larg turizmit masiv.
Formentera, Spanjë
Zbrit në Ibiza, pastaj merr një traget për në Formentera. E bukur, kompakte, perfekte qoftë me miqtë apo familjen. Merr me qira një skuter ose një biçikletë elektrike dhe zbulo plazhet e saj si kartolinë. Nga Ses Illetes, me rërë të bardhë dhe det bruz, deri në Cala Saona, të rrethuar nga shkëmbinj të kuq. Ndalo për të ngrënë në një chiringuito me pamje nga deti dhe shijo atmosferën e relaksuar të ishullit.
Ishujt Brehat, Francë
Këta ishuj të vegjël pranë bregdetit të Bretanjës janë të njohur për plazhet e tyre të qeta, kopshtet e harlisura dhe atmosferën e relaksuar. Ato janë perfekte për ata që kërkojnë një vend të qetë larg turmave, me ujëra për t’u zhytur dhe peizazhe marramendëse. Jo vetëm kaq, por këtu ende nuk ka makina.
Knokke-Heist, Belgjikë
Nëse ju pëlqejnë serialet televizive, nuk do ta keni humbur “Knokke Off” në Netflix, i cili tregon aventurat e një grupi adoleshentësh vendas. Jemi në bregdetin belg, i cili shtrihet për 67 kilometra duke filluar nga De Panne. Mes dunave të rërës që ndërthuren me historinë, artin, kulturën dhe traditat gastronomike. Ideale nëse po kërkoni pushime bregdetare ndryshe nga zakonisht.
Lagos, Portugali
Përdoreni këtë vendndodhje si bazë për të vizituar Algarven, pjesën jugore të Portugalisë. Një zonë e pasur me bukuri natyrore (si dhe me ushqim dhe verë). Merrni me qira një makinë dhe vizitoni plazhe të tilla si praia do Camilo, praia Dona Ana dhe shpella Benagil , një kupolë natyrore me një hapje rrethore në majë.
Folegandros, Greqi
Është ishulli që nuk e prisni. Nuk ka asgjë për t’u pasur zili atyre më të famshmëve, përkundrazi: ofron peizazhe marramendëse, akropole të lashta, plazhe të largëta. Atmosfera është autentike dhe e qetë dhe, duke qenë (për momentin) larg turizmit masiv, mbetet një oaz i përsosur, veçanërisht nëse jeni çift. Mos e humbisni kuzhinën vendase./e.t
