Një familje australiane po përpiqet me çdo kusht të gjejë djalin dhe vëllanë e tyre, i cili u zhduk gjatë një ecjeje në Shqipëri më shumë se tetë muaj më parë.
Kërkimet e shumta nuk kanë arritur të gjejnë Cameron Twiss, 28 vjeç, dhe tani familja e tij nga Adelaide po përpiqet të mbledhë fonde për të vazhduar kërkimet në mënyrë private.
Twiss nuk u kthye më pasi kishte nisur një shteg ecjeje në Bjeshkët e Nemuna më 13 tetor 2024. Ai ishte nisur i vetëm nga Valbona, në veri të Shqipërisë, drejt Thethit, rreth 17 kilometra larg.
Sendet personale të tij, përfshirë pasaportën, u gjetën më vonë në hostelin ku qëndronte.
Policia shqiptare dhe ekipe profesioniste kërkimi në mal shpenzuan mijëra orë pune për të kërkuar përgjatë shtegut, duke përdorur dronë dhe qen nuhatës për të gjetur Twiss. Megjithatë, nuk u gjet asnjë gjurmë tjetër e tij dhe kërkimi u ndërpre pas dy javësh.
Stuart Twiss, vëllai i Cameron, ka rihapur një fushatë për mbledhje fondesh me qëllim angazhimin e një detektivi privat për të vazhduar hetimin dhe për të zbuluar ndonjë gjurmë të re mbi vendndodhjen e vëllait të tij. Ai tha se Departamenti Australian i Punëve të Jashtme dhe Tregtisë nuk ka mundur të japë ndonjë përgjigje për familjen.
“Deri tani, policia shqiptare nuk ka gjetur asnjë provë dhe DFAT nuk ka mundur të ndihmojë,” tha Stuart Twiss. “Familja jonë ka angazhuar tashmë hetues privatë, por pavarësisht përpjekjeve të tyre, nuk kemi pasur asnjë përparim. Po kërkojmë ndihmë … për të vazhduar kërkimin për Cameron.”
Kur Twiss u zhduk fillimisht, banorët lokalë i thanë 7NEWS se shtegu 17 km i gjatë duhet të përshkohet zakonisht me një udhërrëfyes profesionist. Megjithatë, besohet se Twiss është nisur i vetëm.
Në atë kohë, një mik i tij i tha 7NEWS se kishin frikë se ai mund të kishte rënë nga ndonjë shkëmb ose të ishte përballur me ndonjë ngjarje të rëndë./E.T
