Sistemi elektroenergjetik po ecën drejt integrimit të tregjeve, liberalizmit të furnizimit dhe vetëprodhimit të energjisë. Kështu u shpreh ministrja e Infrastrukturës dhe Energjisë, Belinda Balluku, teksa foli për arritjet, sfidat dhe masat e marra për menaxhimin e sezonit turistik. Sipas saj deri në 2030, Shqipëria synon të kthehet në eksportuese neto të energjisë.
“Aktualisht ky sektor ndodhet në momentin më të mirë duke patur parasysh rezultatet. Sistemi elektroenergjetik po ecën drejt integrimit të tregjeve, liberalizmit të furnizimit dhe vetëprodhimit të energjisë. Të gjithë komponentët e këtij sektori janë drejt përmirësimit duke sjellë rezultat të mirë të gjithë treguesve. Brenda viteve 2030 pretendojmë të kthehemi në vend ekspertues neto të energjisë së rinovueshme”.
Një ndër pikat kyçe të këtij zhvillimi, theksoi ajo, është shtimi i kapaciteteve prodhuese.
Vetëm gjatë vitit të fundit, theksoi Balluku, janë shtuar 500 megavat orë energji të prodhuar nga parqet diellore, duke kontribuar në diversifikimin e portofolit energjetik të vendit.
Ajo theksoi se Shqipëria është bërë tërheqëse për investime ndërkombëtare në energjinë e rinovueshme.
“Shqipëria ka rritur kapacitete prodhuesve të ardhura nga parqet solare dhe duke krijuar diversifikim të portofolit, duke garantuar zhvillim të mbështetur në burimet e rinovueshme të energjisë Shqipëria është një nga vendet tërheqëse për investime ndërkombëtare në energjinë e rinovueshme, duke pasur parasysh të gjitha kompanitë e huaja që operojnë në territor. Shëndoshja financiare e sektorit elektrik solli një sërë rezultatesh të mira të cilat janë të bazuara mbi performancën”.
Sipas Ballukut, kjo performancë solli që “për herë të parë pas 30 vitesh në sistemin elektroenergjetik bëmë një ulje të çmimit, e cila është prej 10.5% e faturës së abonetëve për 1 milionë e 70 abonentë”.
Nga kjo ulje, informoi ajo, qytetarët përfitojnë rreth 100 milionë euro në vit. Gjithashtu, sipas raportit të Forumit Ekonomik Botëror, informoi Balluku, Shqipëria ka marrë 78,8 pikë në treguesin e qëndrueshmërisë energjetike, duke u renditur e para në rajon dhe duke lënë pas vende si Zvicra dhe Franca.
Zëvendëskryeministrja Balluku theksoi se së shpejti do të hidhet për konsultim publik ligji i ri për sektorin e energjisë elektrike, i cili synon modernizimin e mëtejshëm të tregut dhe garantimin e konkurrencës së ndershme, në përputhje me standardet e BE-së. m.p.
