Mëngjesin e sotëm Shqipëria u godit nga dy tërmete të njëpasnjëshëm.
Sizmiologu Rrapo Ormëni në një intervistë për mediat është shprehur se janë pasgoditje të tërmetit të 24 qershorit.
“Këto quhen pasgoditje që nga 24 qershori, sepse kanë rënë në të njëtën zonë. Do të ishin problematikë nëse tërmetet do të ishin 4.4 ose 4.5 ballë”, tha Ormëni.
Sizmiologu nënvizoi se rënia e tërmeteve nuk ka lidhje me stinën apo temperaturat e larta. Ai tha se zona e Adriatikut është mjaft aktive për tërmete.
“Fushë- Kruja futet te zona sizmike në vendin tonë. Adriatiku është një zonë që çliron tërmete të njëpasnjëshme. Zona Lushnjë-Elbasan dhe Korçë-Peshkopi gjithashtu janë mjaft aktive sa i përket aktivitetit sizmiologjik”, tha sizmiologu.
Ormëni në përfundim theksoi se goditjet mund të vazhdojnë me ditë ose me javë./E.T
