Drejtoresha e Institutit të Shëndetit Publik (ISHP), Eugena Tomini, ka deklaruar se në javët e fundit janë konfirmuar 6 raste të reja me Covid-19 në vendin tonë.
Në një intervistë televizive, Tomini theksoi se aktualisht nuk ka asnjë element që lidhet me nënvariantin e ri të raportuar së fundmi në Shtetet e Bashkuara të Amerikës. Ajo u bëri thirrje qytetarëve të tregojnë më shumë kujdes me higjienën personale, veçanërisht gjatë kësaj periudhe të nxehtë vere.
Çdo nënvariant i ri monitorohet. ISHP vijon monitorimin e gripit dhe Covid-19 në mënyrë paralele. Vetëm javët e fundit kemi pasur 6 raste Covid-19 të konfirmuar, dhe asnjë element mbi karakteristikat të një nënvarianti të ri,” u shpreh Tomini.
Ajo shtoi se ISHP është në koordinim të vazhdueshëm me strukturat ndërkombëtare dhe se situata nga vlerësimi epidemiologjik është e qetë. Megjithatë, Tomini theksoi se në sezonin e verës, masat e kontrollit respirator dhe higjienik duhet të jenë të shtuara. “Edhe pse nuk jemi në sezon gripi, Covid-19 ka treguar se është prezent gjatë gjithë vitit, e kemi prezent dhe do ta kemi gjithmonë,” tha ajo.
Drejtoresha e ISHP-së këshilloi qytetarët të kenë kujdes me etiketën e shenjave respiratore si rrufa, dhimbje koke, temperaturë, të cilat janë karakteristike për çdo virozë. Ajo theksoi se për të shmangur infektimin e të tjerëve, baza duhet të jetë higjiena personale dhe etiketa respiratore.
Tomini gjithashtu bëri të ditur se alergjitë e stinës dhe infeksionet respiratore janë prezente, por numri i tyre është i ulët krahasuar me periudhën e pikut. Infeksionet, tha Tomini, janë kryesisht pulmonare, shpesh të shkaktuara nga ndryshimet e temperaturave. “Nuk kemi viroza të tjera, s’kemi konfirmuar grip në survejancën të sindromit të ngjashëm me gripin. Vetëm 6 raste nga buletini i fundit i ISHP janë me Covid. Alergjitë e stinës apo elementë të tjerë të infeksioneve pulmonare që vijnë si pasojë e ndryshimit të temperaturave. Infeksionet respiratore janë prezent por në numër të ulët sesa në periudhën kur është piku janar-shkurt,” përfundoi Tomini.
