Një gjetje krejt e pazakontë ka ndodhur kohët e fundit në duart e përkthyeses së njohur Etleva Kondakçiu. Teksa kishte blerë një libër të vjetër në rrugë, ajo ka zbuluar mes faqeve të tij një kartolinë të vjetër, me shumë vlerë historike dhe emocionale.
Kartolina rezulton të jetë e dërguar nga Liri Belishova, një nga figurat më të njohura politike të periudhës komuniste, e cila pas përjashtimit dhe dënimit politik, u internua në qytetin e Cërrikut. Ajo i ishte drejtuar vëllait të saj, Bardhyl Belishova, i cili në atë kohë ndodhej i burgosur në burgun famëkeq të Burrelit.
Në disa rreshta të shkruar me dorë, Liria përpiqet të mbajë gjallë lidhjen njerëzore me vëllain e saj, përtej trysnisë, ndëshkimeve dhe vuajtjes. Kartolina është dëshmi e rrallë e dhimbjes familjare që solli përçarja e pamëshirshme e sistemit totalitar, që nuk kurseu as ata që dikur kishin qenë pjesë e elitës së tij.
Ky episod i vogël, por domethënës, rikthen edhe njëherë vëmendjen te historitë e pathëna të dhimbjes dhe qëndresës, që ende fshihen në librat, kujtimet dhe dokumentet e haruara të një periudhe që la plagë të thella në shoqërinë shqiptare./kb
