Një zjarr i madh ka përfshirë periferi të Marsejës, qytetit të dytë më të madh të Francës, duke plagosur lehtë rreth 110 persona, përfshirë nëntë zjarrfikës dhe 22 policë, dhe duke detyruar evakuimin e mbi 400 banorëve.
Zjarri, i cili shpërtheu të martën pranë zonës Pennes-Mirabeau, është përhapur me shpejtësi ekstreme – deri në 1.2 km në minutë – duke djegur rreth 700 hektarë tokë. Shkaku i zjarrit mendohet të jetë një automjet që u përfshi nga flakët në autostradë.
Ministri i Brendshëm, Bruno Retailleau, njoftoi se 800 zjarrfikës po luftojnë me flakët dhe përpjekjet për shuarjen e tyre do të vazhdojnë gjatë natës. Kryetari i bashkisë, Benoît Payan, e përshkroi përballjen me zjarrin si një “luftë guerile me tuba uji në dorë”.
Presidenti Emmanuel Macron u shpreh nga Londra se “mendimet janë me të lënduarit dhe banorët”, ndërsa u bëri thirrje qytetarëve të ndjekin udhëzimet e sigurisë.
Aeroporti i Marseille Provence u mbyll për disa orë por do të rifillojë pjesërisht operimet nga ora 21:30. Moti i thatë dhe erërat e forta, në një zonë pa reshje që nga 19 maji, kanë favorizuar përhapjen e flakëve.
Pamje dramatike tregojnë re të dendura tymi mbi qytet, ndërsa banorët e zonave të prekura e përshkruajnë situatën si “apokaliptike”./e.t
