Media prestigjoze britanike “Daily Mail”, i ka kushtuar një artikull të veçantë goditjes së një grupi shqiptar që merrej me trafikimin e kokainës nga Kolumbia dhe Ekuadori, në vendet e BE, kryesisht në Britaninë e Madhe. Bëhet fjalë për grupin e Ermir Ndreaj dhe vëllezërve Hoxhosmani.
“Një shqiptar i pasur me një sërë biznesesh britanike dhe një vjehrrë politikane joshëse është arrestuar së bashku me vëllain e tij nën akuzat se kanë marrë pjesë në një komplot kontrabande kokaine me vlerë 335 milionë paund”, shkruan media britanike.
Klevis Hoxhosmani, 37 vjeç, dhe vëllai i tij 42-vjeçar, Arturi, u arrestuan nga SPAK javën e kaluar, për përfshirjen e tyre të dyshuar në një tentativë për të trafikuar sasi të mëdha kokaine nga Amerika Latine në Mbretërinë e Bashkuar dhe BE.
“Hoxhosmani është në një lidhje me Kejda Ajazin – vajzën e Majlinda Bregut, 51 vjeç, ish-ministres së Shqipërisë për Integrimin Europian, e cila dha dorëheqjen si deputete në vitin 2017 dhe tani punon për një organizatë të quajtur Këshilli i Bashkëpunimit Rajonal”, vijon shkrimi.
“Daily Mail” thotë se çifti i ri është i njohur në Shqipëri për shfaqjen e stilit të tyre luksoz të jetesës në mediat sociale, duke përfshirë udhëtime të shpeshta në Londër, Dubai dhe Monako – ku u filmuan së fundmi të veshur me veshje firmato, ndërsa dilnin nga një supermakinë.
E përditshmja britanike i referohet pamjeve që u bënë virale muaj më parë në internet, kur Kejda dhe Klevisi zbrisnin nga një makinë “Rolls Royce” në Monako, përpara një prej kazinove më të famshme në botë.
“Arrestimi i Hoxhosmanit ka nxitur tani spekulime në Shqipëri rreth burimit të vërtetë të pasurisë së çiftit. Kjo do të jetë gjithashtu me interes për oficerët e Strukturës Speciale kundër Korrupsionit dhe Krimit të Organizuar (SPAK) të Shqipërisë, e cila po mbikëqyr hetimin që çoi në arrestimin e tij.
Prokurorët shqiptarë pretendojnë se Hoxhosmani dhe vëllai i tij ishin pjesë e një grupi të madh ndërkombëtar të krimit të organizuar që përfshinte të paktën nëntë persona të tjerë”, shkruan “Daily Mail”, duke zbulua dhe bizneset e tij në Angli.
Bizneset e vëllezërve Hoxhosmani në Britaninë e Madhe
Hoxhosmani ka lidhje të ngushta me Britaninë, me Companies House që e lidh atë me tre biznese me seli në Bournemouth. Ai ishte i listuar si drejtor i Crystal Hand Car Wash, e cila u krijua në vitin 2013 dhe u shpërbë në vitin 2015. Ai është gjithashtu ish-drejtor i Barrack Road Tyres, një dyqan gomash në Christchurch që tani është nën pronësi të re.
Hoxhosmani mbetet drejtor i Opa Coffee Limited, e cila është e regjistruar në një dyqan të zbrazët pranë Central Gardens, një park në qendër të qytetit të Bournemouth.
Ai ka një precedent penal në Mbretërinë e Bashkuar dhe u deklarua fajtor në vitin 2014 për sulm ndaj një gruaje në Ferndown aty pranë. Atij iu dha një urdhër për të drejtat e komunitetit dhe iu tha të paguante 60 paund dëmshpërblim.
Vëllai i tij, Arturi, është ish-pronari i një tjetër lavazh makinash vendas, Ferndown Hand Car Wash, ku dy burra – një afgan dhe një irakian – u arrestuan së fundmi për shkelje të kushteve të lirimit me kusht.
Sipas prokurorëve, banda e drogës e merrte kokainën nga Kolumbia ose Ekuadori. Ajo dyshohet se është transportuar në kontejnerë detarë në porte kryesore në Evropë, si Antverpi në Belgjikë dhe Roterdami në Holandë. Më pas është drejtuar nga toka për në Francë dhe përmes Tunelit të Kanalit për në Mbretërinë e Bashkuar, pretendohet.
Prokurorët thanë se drogat ishin të fshehura në paleta druri, kuti me banane dhe qese me fasule kakaoje, ndërsa të tjerat ishin të përfshira në ngarkesa me dru.
Shkrimi origjinal ne median britanike Daily Mail:
