PSG ka nxjerrë në “rrugë” portierin Gianluigi Donnarumma dhe vendimi i fundit lë pak vend për diskutime. Portieri italian, një nga protagonistët kryesorë të ecurisë fantastike që u kurorëzua me fitoren e Ligës së Kampioneve, është lënë jashtë skuadrës për ndeshjen ndaj Tottenham, të vlefshme për Superkupën e Europës.
Parisienët kanë blerë Lucas Chevalier nga Lille dhe për ta është e qartë se do të jetë ai portieri i të ardhmes. Ndaj në planet e Luis Enrique, Donnarumma nuk shihet më si një opsion. Por pakkush priste që ndarja mes palëve të vinte në këtë mënyrë kaq publike.
Tashmë është e qartë se portieri do të kërkojë një sistemim tjetër gjatë kësaj vere, ose të presë qetësisht verën e vitit 2026, kur i mbaron kontrata me klubin parisien dhe mund të largohet si futbollist i lirë, edhe pse kjo do të nënkuptonte një vit pa u aktivizuar nga gardiani i Italisë, në prag të Botërorit./ D.C
