Personi që shihni në foton më poshtë është Dilaver Idrizi, 61-vjeçari i cili u arrestua nga policia dhe akuzohet për vrasje të mbetur në tentativë.
(Foto nga TCH)
Ai dyshohet të jetë personi që ka dhunuar dhe më pas e ka hedhur partneren e tij nga ballkoni i katit të tretë.
Në gjyq ai është shfaqur me kokën ulur në pritje të masës së sigurisë e cila do të jepet sot nga gjykata.
Ngjarja
Mesazhet që i kanë shkuar gruas në telefonin e bashkëjetuesit të vet si urim për festën e 8 Marsit janë bërë shkak që në Kamzë të kryhet një akt horror, që vetëm fati e ka shpëtuar gruan.
Ngjarja e rëndë është shënuar pak ditë më parë në Kamzë, ku Policia bëri me dije se një grua është rrëzuar aksidentalisht nga ballkoni i banesës së saj.
Madje, përgjatë gjithë kohës që gruaja ka qëndruar në spital, te koka ka pasur bashkëjetuesin e saj, duke shmangur kështu të gjitha dyshimet që mund të ngriheshin për atë çka do të trondiste më pas.
Policia ka dokumentuar fillimisht dëshminë e të dëmtuarës dhe të burrit që qëndronte me të, duke e klasifikuar ngjarjen si aksidentale.
Por më pas, ka qenë e bija e të plagosurës e cila ka tronditur Policinë me dëshminë e saj. Ajo i ka besuar Policisë atë që i kishte thënë e ëma në një moment kur kishte qenë e vetme me të bijën, pasi i shoqi asnjë sekondë nuk e linte vetëm.
Policia ka ndërhyrë, duke e vënë në pranga bashkëshortin dhe më pas ka zbardhur dhe krimin e rëndë. Nga të dhënat është mësuar se bëhet fjalë për një xhelozi të sëmurë që i ka nisur burrit kur ka parë SMS-të e urimeve në telefonin e tij, por që më pas rezultoi se ato mesazhe kishin ardhur nga një qendër humanitare, së cilës gruaja iu kishte drejtuar për ndihmë.
Ai e ka dhunuar barbarisht duke e lënë pa ndjenja, ndërkohë që në momentin që gruaja është përmendur dhe i ka kërkuar ujë, ai e ka marrë ujin dhe ia ka hedhur në fytyrë, duke bërë që ajo të humbasë sërish ndjenjat dhe më pas e ka hedhur nga ballkoni i katit të tretë. Ngjarja është dokumentuar nga oficerët e Policisë Gjyqësore dhe i ka kaluar Prokurorisë për hetime të mëtejshme!
