Autoriteti i Mbikqyerjes Financiare ka vendosur mbi kompensimin që kompanitë e sigurimit duhet të japin për aksidentet dhe vdekjet nga automjetet.
Kompensimi i dëmeve do të ketë vlerën prej 446 milionë lekësh. AMF bën të ditur se shoqëritë duhet të vijojnë me pagesat e praktikave me datë ngjarje më të hershme ndërkohë që do të jetë Byroja Shqiptare e Sigurimit ajo që do të shpërndajë dhe të njoftojë shoqëritë e sigurimit për vlerën respektive të Fondit të Kompensimit.
Asambleja e Përgjithshme e Anëtarëve te BSHS-së në mbledhjen e datës 5 dhjetor 2019, shqyrtoi Fondin e Kompensimit, situatën e çështjeve gjyqësore dhe propozoi që masa e kontributit për Fondin e Kompensimit të vitit 2020, të jetë 311,215,112 lekë ndërkohë që Fondi që miratoi AMF është 446 milionë lekë.
Autoriteti i Mbikëqyrjes Financiare bëri me dije se bazuar në vendimin e Bordit nr. 260, datë 28.12.2018, shoqëritë e sigurimit duhet të raportonin në pasqyrat financiare me datë 31.12.2019, provigjon për shpenzime për Fond Kompensimi, vlerën 382,784,517 lekë, që i përket praktikave në proces trajtimi dhe në proces gjyqësor në Gjykatën e Shkallës së Parë.
