Janë dy skuadra që e kanë mësuar prej javësh fatin e tyre, teksa sezonin e ardhshëm do të luajnë një nivel më poshtë në Kampionatin Kombëtar të Futbollit, në Kategorinë e Parë, e mbase për të njëjtën arsye, tanimë të çliruar nga pritshmëritë, kanë dhuruar lojëra të mira gjatë ndeshjeve të fundit. Kështu, trajneri i Luftëtarit Neritan Novi, vlerësoi skuadrën për ndeshjen me Skënderbeun, ku gjirokastritët u bënë qëndresë për 75 minuta korçarëve, të cilët fituan falë golit të Blerim Krasniqit.
“Është e vërtetë ajo që thoni ju, që Luftëtari sot zhvilloi ndeshje me ritëm të kënaqshëm, – tha ai, duke iu përgjigjur gazetarëve në konferencën për shtyp pas ndeshjes me Skënderbeun. – Goli erdhi për fajin e mbrojtjes dhe aftësisë së sulmuesit të Skënderbeut. Ndikoi ndoshta dëmtimi i Isufit. E kam thënë kemi djem me cilësi të mira, por përvoja e tyre na ka dëmtuar.”
“Nga ndeshja në ndeshje, në mbrojtje kanë luajtur shumë lojtarë të rinj, – ka vijuar ish-futbollisti gjirokastrit. – Sot ka luajtur mbrojtësi i majtë një futbollist i skuadrës së Nën-19-vjeçarëve.” Ndërkohë, edhe pse u mposht me rezultatin 2-0 përballë Tiranës, edhe se skuadra vlonjate është e rënë nga kategoria prej shumë kohësh, Flamurtari ka bërë një paraqitje dinjitoze të shtunën në Stadiumin “Selman Stërmasi” në kryeqytet, duke i vënë në vështirësi bardheblutë.
“Për 70 minuta kemi bërë një ndeshje të mirë, më pas hasëm probleme, – ka deklaruar trajneri i Flamurtarit, Marselo Troizi. – Ndeshje pas ndeshje e shikoj që ekipi ka rritje. Ekipi i Tiranës është me shumë përvojë. Unë kam ekip më futbollist të rinj. Unë mendoj se kemi bërë një ndeshje të mirë. Rrapaj është një futbollist shumë të talentuar. Për mua është lojtar shumë i mirë. Kam folur me Idrizin për sezonin e ri. Do të shikoj çdo bëj, ende nuk kam firmosur një kontratë. Të përfundojmë njëherë këtë sezon.”
Përtej këtyre shkëndijave që erdhën shumë vonë, Flamurtari dhe Luftëtari, apo thënë ndryshe dy qytete historike të futbollit shqiptar, do të detyrohen sezonin e ardhshëm të kënaqen me nivelin e dytë të Kampionatit Kombëtar.Ka.Li/fjala.al
