Ka qenë padyshim një nga ato historitë e denja për “Hirushet” e topkëmbës dhe një e tillë është kurorëzuar të shtunën në futbollin kroat, atje ku shqiptarët e Lokomotivës së Zagrebit kanë arritur suksesin më të madh në historinë e klubit, duke e dërguar skuadrën në turet eliminatore të Ligës së Kampioneve. Në fakt, ka qenë një mbrëmje magjike ajo e së shtunës për futbollistët shqiptarë që aktivizohen te Lokomotiva e Zagrebit.
Aty ku bëhet fjalë për një koloni me 5 shqiptarë, 4 të Shqipërisë dhe një të Kosovës, duke filluar nga Mersinaj, Çokaj, Tuci, Uzuni dhe te Kastrati, të cilët triumfuan me rezultatin 2-1 të shtunën në mbrëmje në sfidën e drejtpërdrejtë dhe vendimtare në fushë të huaj ndaj Osijekut të Eros Grezdës, duke e mbyllur kampionatin në vendin e dytë, që të siguron një biletë për në turet eliminatore të Ligës së Kampioneve. Ky është padyshim suksesi më i madh historik i arritur nga Lokomotiva e Zagrebit.
Dhe, për këtë arritje meritë të jashtëzakonshme kanë padyshim edhe 5 shqiptarët, të cilët kanë qenë protagonistë të rregullt në vazhdën e rezultateve mbresëlënëse të skuadrës tjetër të kryeqytetit kroat. Për sa i përket triumfit të së shtunës, golat për Lokomotivën u realizuan nga Jakiçi dhe Lonçari (ky i fundit shënoi në portën e tij), ndërkohë që për Osijekun realizoi Mariçi, i cili barazoi përkohësisht shifrat. Në këtë “finale” për Evropën, u aktivizuan titullarë plot 4 futbollistë shqiptarë, ndërsa i vetmi që nuk u aktivizua ishte sulmuesi Tuci, i cili, sidoqoftë, ishte në stol.
Ndërkohë për sa i përket Eros Grezdës, ai nuk ishte i grumbulluar për këtë përballje, për shkak të problemeve që dihen. Në fushën e lojës për Osijek, ishte dhe ish-futbollisti i Tiranës, Merveje, i cili aktivizohet së fundmi te skuadra kroate. Çokaj dhe Mersinaj u aktivizuan përkatësisht për 70 dhe 74 minuta, kurse Uzuni dhe Kastrati përgjatë gjithë 90 minutave. Përveç rezultatit të skuadrës, ai që ka spikatur ka qenë edhe rendimenti i futbollistëve shqiptarë këtë sezon me Lokomotivën e Zagrebit.
Kështu, futbollisti i përfaqësueses së Kosovës, 21-vjeçari Lirim Kastrati ka luajtur 33 nga 36 ndeshjet e këtij sezoni, duke realizuar 11 gola, ndërsa 25 vjeçari Myrto Uzuni ka realizuar 9 gola në 31 ndeshje që ka luajtur. Sulmuesi tjetër shqiptar, Indrit Tuci, ndonëse 19 vjeç, ka luajtur 25 ndeshje me Lokomotivën e Zagrebit, duke shënuar 4 gola, ndonëse duhet theksuar se vetëm në 11 prej këtyre ndeshjeve ka qenë titullar, ndërsa në 14 të tjerat është aktivizuar si zëvendësues.
Rrugën e rrjetës e ka gjetur një herë edhe mesfushori 21-vjeçar Enis Çokaj, i cili ka luajtur 29 ndeshje, ndërsa shijen e golit nuk e ka provuar vetëm mbrojtësi 21-vjeçar, Jon Mersinaj, i cilia ka luajtur 24 ndeshje me Lokomotivën e Zagrebit. Një tjetër fakt që vlen të veçohet në triumfin e skuadrës kryeqytetase, të drejtuar nga trajneri Goran Tomiç, është mosha e re mesatare e grupit, aty ku padyshim një meritë të veçantë ka edhe zbuluesi shqiptar i talenteve, Besnik Prenga.
