Deputeti i AAK-së në Kosovë, Gazmend Syla ka reaguar pas ndalimit nga autoritetet shqiptare të ish-luftëtarit të UÇK-së, Murtez Kastrati.
Përmes një postimi në rrjetet sociale, Syla i drejtohet kryeminsitrit Edi Rama me një letër të hapur, ku shkruan se sa më shumë të mbahet Murtez Kastrati në burgjet shqiptare aq më tepër thyhen zemrat e ushtarëve që luftuar për ta bërë Shqipërinë. Ai i kërkon Ramës që të heqë dorë nga listat e të përndjekurve ushtarët e UÇK-së me flet-arreste nga Serbia, ndërsa gjithashtu në fund ai shkruan se arrestimi i Kastratit është një turp.
“Letër e hapur ndaj Kryeministrit Edi Rama. Sot duke e kaluar kufirin me Shqipërinë u arrestua ushtari i UÇK-së nga Lipjani, Murtez Kastrati. Arsyeja? Fletarresti i lëshuar nga Serbia. Z. Rama, Serbia është në ofensivë që nga shporrja nga Kosova dhe ky lajm përbën skandal. Ti këtë e di fort mirë. Z. Rama, ne ushtarët e UÇK-së i dimë vijat e kuqe me shtetet në rajon, Shqipëria nuk mundet e as nuk bën të jetë e tillë. Edhe këtë, ti e di fort mirë. Z. Rama, sa më shumë që mbahet Murtez Kastrati në burgjet tuaja, aq më tepër thyhen zemrat e ushtarëve që sa të jetë jeta jetë luftuan për ta bërë Shqipërinë. Prandaj, z. Rama, si deputet i Kuvendit të Kosovës dhe ushtarë i UÇK-së, kërkoj nga ju që të lirohet menjëherë Murtezi dhe të hiqni nga listat e të përndjekurve ushtarët e UÇK-së me fletarreste nga Serbia. Qoftë ky turpi fundit!” ka shkruar Syla në rrjetet sociale./Re.Gu/Fjala.al
