Nënkryetari i LSI-së, Petrit Vasili, komenton deklaratat e diplomates gjermane, ish-ambasadores në Shqipëri, Sussane Schutz, për procesin e integrimit të Ballkanit Perëndimor në BE.
Sipas tij, Gjermania konfirmon se Maqedonia i hap negociatat, ndërsa Shqipëria jo. Sipas tij, për shkak të Ramës integrimi ndodhet në momentin më të keq të tij.
“Sussane Schutz, drejtoreshë e Ballkanit Perëndimor në Ministrinë e Jashtme Gjermane, dhe ish-ambasadore e Gjermanisë në Shqipëri, konfirmon se: Maqedonisë i hapen negociatat, ndërsa Shqipërisë jo.” – shkruan Vasili.
Ai citon zj. Schutz që thotë se “Ne synojmë të mbajmë konferencën e parë ndërqeveritare me Maqedoninë e Veriut dhe, nëse plotësohen kushtet, gjithashtu edhe me Shqipërinë gjatë presidencës sonë të Këshillit”.
Duke iu referuar kësaj deklarate, nënkryetari i LSI-së shkruan se “këto janë pasojat e qeverisjes së Edi Ramës. Plot dy vjet më parë ishte po Edi Rama që dekoronte ambasadorët dhe gënjente dynjanë për hapjen imagjinare të negociatave.
Sot e kësaj dite, për shkak të Edi Ramës, integrimi i Shqipërisë ndodhet në momentin më të keq të tij”.
la.mi/Fjala.al
