Nëse nuk është Mark Markez, nuk ka pikë. Kështu mund të përmblidhet me pak fjalë historia e skuadrës japoneze, pas 3 garave të para në nivelin më të lartë të Botërorit të të Motoçiklizmit, Moto GP-së. Dëmtimi i kampionit në fuqi të botës, operimi dhe rioperimi i tij në krah, kanë bërë që “Honda”, të mos ngjitet në podium në asnjë nga garat e zhvilluara deri tani, diçka që nuk ishte parë në Botërorët e mëparshëm, që nga viti 1982.
Mungesa e rezultateve i detyroi drejtuesit japonezë të thërrasin Stefan Bradlin, për të garuar me “RC213V”, deri në rikthimin e 8 herë “kampionit të botës”. “Stefan Bradli është duke bërë shumë prova për Çmimin e Madh të Austrisë, – tha drejtori i skuadrës së “Honda”-s, Alberto Puig. – Të shikojmë se si do shkojë në garën e ardhshme”. Ndërkohë, mësohet se Mark Markezi është duke u rikuperuar me shpejtësi. Sepse, siç ka thënë edhe vetë kampioni spanjoll: “Rënia lejohet, ndërsa ngritja në këmbë është një detyrim”.
Kjo shprehje motivuese e shkruar nga Mark Márkezi në rrjetet e tij sociale, pas operacionit të dytë në shpatull, të le të kuptosh se ai po bën gjithçka për t’u rikthyer në garë. Gjithçka duket e gatshme në garazhin e motorit me numrin e famshëm 93, për kthimin e tij dhe ëndrrën për të arritur të pamundurën. Dihet tashmë. Heronjtë kurrë nuk heqin dorë./Fjala.al
