“Artistja e Merituar” Fitnete Rexha, në vitin 1961 ishte një ndër këngëtaret më të njohura të muzikës popullore të Shqipërisë së mesme, të muzikës popullore qytetare tiranase.
Vajza më e vogël e Bab Rexh Delisë “Hero i Popullit”, familja krutane e të cilit njihet për vlerat e traditës, kultivonte prej shumë brezash këngën popullore.
Rreth moshës 15 vjeçare ajo këndon dhe regjistron këngët e para popullore në Radio-Tirana nën shoqërinë e grupit orkestral të Shqipërisë së mesme të drejtuar nga Muharrem Gura dhe Skënder Reka. Orkestrina përbëhej nga muzikantet Skënder Reka-fisarmonikë, Liu i Nushit dhe Çerçiz Mehmeti në violinë, Reshit Shehu në dajre, Mustafa Zyberi në klarinetë, Riza Selita në kontrabas, Emil Miloti dhe Fadili i Ansamblit të Ushtrisë në kitarë.
Fillimisht fillon punë si këngëtare në Estradën e Tiranës dhe më pas aktiviteti i saj si këngëtare u zhvillua tërësisht pranë A.K.V.P-së në Tiranë deri në daljen në pension në vitin 1981. Ndër këngët më të bukura të kënduara prej Fitnete Rexhës përmendim: “Te selvitë e Namazgjasë”, “Qënke veshur me të bardha”, “Mun aty tek shtatë zymbylat”, “Dy të bukurat në nji derë” etj.
Regjistrimet muzikore të saj gjenden sot kryesisht pranë Radio-Tiranës.
Akademik. Prof. Çesk Zadeja ka thënë se sa herë të dëgjohet kënga popullore e Shqipërisë së Mesme, gjithmonë do të kujtohet këngëtarja Fitnete Rexha.
ru.do/ Fjala
