Kreu i Grupit Parlamentar të Partisë Socialiste, Taulant Balla, jep mesazhin e tij për zgjedhjet e 30 gushtit në Mal të Zi, duke thënë se shqiptarët që jetojnë atje kanë mundësinë e shkëlqyer për të votuar listat e partive shqiptare.
Në mesazhin e tij në “Facebook”, shoqëruar dhe me një video nga Mali i Zi, Balla thekson se “ota e 30 gushtit është votë për mbrojtjen e interesave të qytetarëve të Malit të Zi dhe perspektivës europiane”.
Mesazhi i plotë i Ballës:
Në 30 gusht 2020 shqiptarët në Malin e Zi kanë mundësinë e shkëlqyer për të votuar listat e partive shqiptare.
Nën shembullin e Nik Gjeloshajt, shqiptarët arritën të tregojnë se kur janë bashkë mund t’ja dalin, sikurse fituan Tuzin. Është sërish koha për të luajtur një tjetër rol historik.
Thirrja jonë e socialistëve shqiptarë është për të mbështetur listën shqiptare, duke forcuar edhe aleancën me progresistët e Partisë Demokratike të Socialistëve, për një Mal të Zi pro-europian.
Vetëm kjo aleancë mund të ruajë drejtimin pro-europian. Vota e 30 gushtit është votë për mbrojtjen e interesave të qytetarëve të Malit të Zi dhe perspektivës europiane./Bl.Ba/Fjala.al
