Grupi negociator i shqiptarëve për një marrëveshjen e re detare me Greqinë do të duhet të ndryshojë nga pala jonë.
Mësohet se të paktën 4 persona të rëndësishëm duhet të ndryshohen, pasi janë larguar nga postet e mëparshme. Ndërkohë ekipi jonë përbëhet nga 13 anëtarë.
Kujtojmë se kapiten Artur Meçollari, ish-zv/komandanti i Forcave Detare Shqiptare, ishte në ekipin negociator shqiptar, por ai u shkarkua pak javë më parë nga Ministrja e Mbrojtjes pasi kishte lejuar zhvillimin e një ceremonie martesore në një nga anijet luftarake shqiptare, pa autorizim nga eprorët. Meçollari, i cili kundërshtoi paktin detar të 2009 të firmosur nga Lulzim Basha, ishte një nga emrat më të kundërshtuar nga opozita shqiptare, kur u përfshi në ekipin negociator nga ministri i Jashtëm i kohës, Ditmir Bushati.
Largohet gjeneral Major Ylber Dogjani, ishte bashkëkryetari ekipit negociator. Ai u shkarkua nga Presidenti i Republikës një vit më parë, nga detyra e Komandantit të Përgjithshëm të Forcave Detare, me propozim të Ministres së Mbrojtjes.
Edhe ish-sekretari i Përgjithshëm i Ministrisë së Jashtme, Qirjako Qirko, tashmë i emëruar ambasador i Shqipërisë në Londër, do duhet të zëvendësohet. Nevojën për të bërë ndryshime në ekipin me të cilin Shqipëria paraqitet përballë palës greke në negociatat për kufirin detar, e njoftoi pak ditë më parë edhe Kryeministri Edi Rama.
Një grua që largohet është Aida Hajnaj, e cila mori këtë të martë detyrën e drejtueses së Byrosë Kombëtarë të Hetimit, duke u larguar nga posti i numrit dy të Policisë së Shtetit, arsye për të cilën ishte përfshirë në ekipin negociator.
Qeveria ende nuk ka zgjedhur negociatorët e rinj, të cilët duhet të marrin besimin e Presidentit të Republikës. Ilir Meta duhet t’i japë plotfuqi emrave që do të propozohen nga Kryeministri Edi Rama, për të vijuar bisedimet tashmë të ndërprera me shtetin helen, për një marrëveshje të re për kufijtë detare.
La.Mi/Fjala.al
