Qendra e kryeqytetit të Bjellorusisë të dielën dhe në qytete të tjera,janë pushtuar nga protestues të shumtë të cilët kanë marshuar duke kërkuar dorëheqjen e presidentit Alexander Lukashenko.
Sipas mediave vendase janë përcjellë pamje nga arrestimet e dhunshme në qytetin e Grodno dhe Brest, si dhe momente nga protestat në katër qytete të tjera.
Demonstratat në Bjellorusi zhvillohen prej katër javësh që pas zgjedhjeve dhe kanë ardhur gjithnjë në rritje përsa i përket numrit të pjesëmarrësve. Protesta e të dielës përllogaritet të ketë tërhequr dhjetëra mijëra persona.
Ndërkohë, në Minsk, policia ka arrestuar dhjetëra protestues, të cilët marshonin përpara ushtarëve në rrugët e kryeqytetit, duke sfiduar paralajmërimin e qeverisë kundër protestave. Raportohet gjithashtu edhe për persona të lënduar nga përballjet me policinë.
Opozita pretendon se zgjedhjet presidenciale të mbajtura një muaj më parë janë manipuluar.
Lukashenko, i cili mban pushtetin që prej vitit 1994, ka refuzuar kërkesat për zgjedhje të reja nga kundërshtarja e tij kryesore, Svetlana Tsikhanouskaya, e cila u arratis nga vendi dy ditë pas zgjedhjeve. Ru. Do/ Fjala
