Vazhdon eksodi i futbollistëve shqiptarë drejt kampionateve të tjera, me Kosovën si destinacion parësor, por edhe me Turqinë dhe me një tjetër “adresë” të pazakontë, siç është Kina.
Pas Jahmir Hykës, edhe Vasil Shkurtaj, një ndër lojtaret më të mirë të kampionatit shqiptar, firmosi të mërkurën në nivelin e dytë të Kampionatit Kinez të Futbollit, në Ligën e dytë kineze, me ekipin e Xhiang-xi Lian-shengut.
Kështu, Vasil Shkurtaj ka nënshkruar në Kinë prej më shumë se dy javësh dhe është në pritje të vizës për të fluturuar drejt Azisë.
Sulmuesi është bindur nga oferta e bërë prej skuadrës së Xhiang-xi Lian-shengut, që tanimë e pret sulmuesin. Bëhet fjalë për një klub të ligës së dytë, kategori ku luajnë edhe të tjerë shqiptarë si Albi Alla dhe Jahmir Hyka.
Sulmuesi vlonjati shënoi 22 gola në Kategorinë Superiore vjet me Kukësin, duke u renditur i dyti pas amerikanit Kirian Nuabueze dhe tani do të provojë një përvojë të re në Kinë.
Veç Shkurtajt, një tjetër lojtari i larguar nga Kukësi është drejt gjetjes së skuadrës së re. Bëhet fjalë për Enis Gavazajn, i cili doli nga planet e drejtuesve të verilindorëve dhe para pak ditësh u zyrtarizua edhe largimi i tij.
Në Kosovë raportojnë se futbollisti nga Prizreni është drejt kalimit te Prishtina, që ka marrë nga Superiorja edhe Gentian Muçën./Bl.Ba/Fjala.al
