Presidenti i Sigal Uniqa Group Austria dhe njëherësh Konsulli i Përgjithshëm i Nderit të Japonisë në Shqipëri, Avni Ponari është nderuar me dekoratë të lartë nga Perandori i Japonisë.
Ponari është vlerësuar për kontributin e tij në forcimin e marrëdhënieve mes Shqipërisë dhe Japonisë. Nga ana e tij, ambasadori Makoto Ito duke folur në ceremoninë e dekorimit, vlerësoi edhe angazhimin e Ponarit në promovimin e kulturës japoneze.
“Jam i lumtur të nderoj zotin Avni Ponari, një nga miqtë e Japonisë këtu në Shqipëri me “Urdhrin e Ngritjes së Diellit, Rrezet e arta”. Dekorata akordohet nga Perandori japonez për forcimin e marrëdhënieve mes dy vendeve. Është kënaqësia ime qe ta falënderoj Ponarin për punën e tij të shkëlqyer dhe për kontributin si Konsull Nderi në mënyrë të veçantë për nxitjen e bashkëpunimit. Pa ndihmën e Zotit Ponari nuk do të ishin të mundura as takimet e Presidentit Meta me zyrtarë të lartë të Japonisë. Unë besoj se suksesi në marrëdhëniet mes vendeve tona mbështetet edhe në punën e njerëzve si zoti Ponari”, u shpreh ambasadori Ito.
Ndërkaq, Avni Ponari e cilësoi dekorimin jo vetëm vlerësim por edhe përgjegjësi. Ai i konsideroi 10 vitet si Konsull Nderi, si mjaft të rëndësishme teksa tha se ka sjellë në Shqipëri praktikat më të mira japoneze të të bërit biznes.
“Jam i nderuar për këtë dekoratë, dhe që përfaqësoj Japoninë në tokën e arbrit. Marrëdhënia e dy vendeve tona është e shkëlqyer dhe me marrjen e kësaj dekorate do bëj më të mirën në lidhje me bashkëpunimet ndërmjet dy shteteve në të ardhmen”, u shpreh Ponari.
Dekorata “Urdhri i Ngritjes së Diellit, Rrezet e Arta” është ndër më të lartat që akordohet nga Perandori japonez për personalitetet e huaja që kanë dhënë një kontribut të çmuar në fuqizimin e marrëdhënieve politike, ekonomike dhe kulturore.
