Makina e gazetarit, Shkumbin Kajtazi të shtunën në darkë është sulmuar me armë zjarri. Policia po heton mbi ngjarjen dhe në një njoftim zyrtar zëdhënësi i Policisë për Rajonin e Mitrovicës, Avni Zahiti tha se në vendngjarje janë gjetur gëzhoja plumbash.
Ndërkohë gazetari Shkumbin Kajtazi përmes një statusi në Facebook ka njoftuar për sulmin dhe ka shkruar që ka bërë denoncimet e nevojshme.
“Mbrëmë u përballa me një sulm të rrezikshëm: vetura ime u qëllua me 5 ose 6 plumba. Ngjarja ka ndodhur rreth mesnatës, kur vetura ishte e parkuar në qendër të Mitrovicës. Unë isha afër dhe kam dëgjuar krisma arme, por si njeri naiv që beson se Kosova është vend normal, nuk e kam lejuar mendjen të më thotë se mund të jetë sulm i tillë. Isha gabim”, ka shkruar Kajtazi.
Kjo është hera e dytë që gazetari Shkumbin Kajtazi sulmohet. Herën e parë, atij kishin tentuar t’ia djegin veturën me benzinë./Jo.Be/Fjala.al
