Një 52-vjeçar nga Italia i cili kërkohej në Gjermani pasi dyshohet se ka kryer gati 160 dhunime dhe sulme seksuale, kryesisht ndaj vajzave të mitura, është arrestuar në Francë.
Brigada BNRF e Francës, për ndjekje të të arratisurve, ka bërë me dije se ka arrestuar të premten të dyshuarin në Rumersheim-le-Haut afër Mulhouse, shkruan rel. Ai ishte shpallur në kërkim pas dhunës që kishte ushtruar ndaj fëmijëve të partnereve të tij në periudhën 2000-2014.
Zyrtarët thanë se 122 dosje deri më tani janë hapur kundër tij në Gjermani.
Në mediat franceze është thënë se në mesin e sulmeve, që dyshohet se ai ka kryer, është edhe dhunimi i vajzës së tij vite më parë. Autoritetet gjermane kanë alarmuar homologët e tyre më 7 tetor, kur i dyshuari ka shkuar në Francë.
Pas identifikimit të vendndodhjes së tij, ai është ndaluar më 16 tetor. Aktualisht ai po mbahet në Kolmar, derisa të përfundojnë procedurat e ekstradimit./Re.Gu/Fjala.al
