Kryebashkiakia e Romës, Virginia Raggi ka treguar se disa organizata kriminale kishin tentuar të vrisnin atë dhe familjen e saj, për shkak se kishte prekur interesat e tyre në zonat ku vepronin.
Raggi, deklaroi për “Canale 5”, se për shkak të vendimit për prishjen e disa objekteve pa leje në vitin 2018, grupet kriminale e kishin shënjestruar për ta eleminuar.
Një arsye kjo që e ka detyruar atë të levizë me eskortë policie.
“Kam marrë disa informacione se po organizonin sulme kundër meje dhe familjes time”, tha Raggi, duke mos preferuar më të japë detaje të tjera.
Gjithashtu, Raggi tregoi edhe për operacionet e kryera ndaj familjeve të tjera mafioze që operojnë në rrethinat e kryeqytetit Italian, si Spada dhe Marando.
“Ka disa vende në Romë, ku njerëzit vijnë të më ankohen për problemet që kanë me familjet mafioze dhe pastaj largohen me shpejtësi, pasi kanë frikë se ndonjë anëtar i këtyre klaneve i shikon me mua”.
Raggi u zgjodh kryebashkiakja e parë femër e Qytetit të Përjetshëm në vitin 2016, si pjesë e lëvizjes anti-estabilishment “5 Yjet”.
Ajo do të rikandidojë përsëri për një mandat tjetër./Re.D/Fjala.al
