Kreu i Kuvendit, Gramoz Ruçi në fjalën e tij në Forumin kundër Antizemitizmit u shpreh se Shqipëria do ta shndërrojë luftën kundër antisemitizmit në çështje të të gjithë Ballkanit.
Kryeparlamentari shqiptar shtoi se antisemitizmi nuk është vetëm kundër hebrenjve, por kundër të keqes, teksa kujtoi marrëdhëniet e ngushta mes shqiptarëve dhe hebrenjve, që kanë nisur shekuj më parë.
“Siguroj se Shqipëria do ta çojë deri në fund misionin e saj për ta shndërruar luftën kundër anti-semitizmit në çështje të të gjithë Ballkanit. Shqiptarët bota i njohu si magjistratët e mbrojtjes së hebrenjve, pa dallim fetar, pasurie e orientim politik. Lufta kundër anti-semitizimit nuk mbron vetëm një komb, por është pjesë e projektit të humanizmit, për një botë më të qetë e në paqe.
Qëndrimi ynë buron sa nga historia, aq edhe nga ekzistenca, aq edhe nga aspiratat tona evropiane. Buron nga partneriteti për të mbrojtur të ardhmen tona. Anti-semitizmi nuk drejtohet vetëm kundër hebrenjve, por kundër të keqes”, deklaroi kryetari i Kuvendit.
Ky Forum u organizua nga Kuvendi i Shqipërisë dhe në të po marrin pjesë personalitete të larta shtetërore nga SHBA, Parlamenti Europian dhe vende të tjera të rajonit.
