Presidenti i SHBA-së, Donald Trump ka kritikuar vendimet e shteteve europiane për të rikthyer izolimin kombëtar, duke i përshkruar masat e vendosura si drakoniane.
Gjatë fushatës së zhvilluar në Michigan, Trump siguroi qytetarët se nuk do të përjetojnë asnjë izolim të tillë të dytë.
Ai paralajmëroi se Biden do të përpiqet të bëjë të njëjtën gjë, duke imituar masat e ashpra.
“Çfarë po bën Europa? Mendoj se duhet të kaloj andej t’ua shpjegoj”, tha Presidenti gjatë fushatës.
Kryeministri i Britanisë së Madhe, Boris Johnson të shtunën njoftoi izolimin deri në dhjetor, duke ndjekur kështu Gjermaninë, Francën dhe Austrinë.
Biden dhe Trump janë përpjekur deri në minutat e fundit të takimeve për të tërhequr sa më shumë votues rreth vetes.
Biden, i cili deri më tani ka një epërsi të ndjeshme ndaj Trump, përmendi edhe njëherë shifrat e larta të viktimave të shkaktuara nga Covid-19, rreth 230 mijë personave.
Ndërkohë, eksperti kryesor i sëmundjeve infective i qeverisë amerikane, Dr.Fauci tha se vendi duhet të përgatitet për rritje të rasteve me koronavirus.
Dr.Fauci, i cili është pjesë e Task Forcës së koronavirusit në Shtëpinë e Bardhë, shtoi se beson që kandidati democrat Joe Biden “po e sheh pandeminë seriozisht nga një perspektivë e shëndetit publik, ndërsa Trump po “e shikon nga një këndvështrim tjetër”./Re.D/Fjala.al
