LëBron Xhejms dhe Los Anxheles Lejkërs kanë rënë dakord për zgjatjen e marrëveshjes edhe për dy sezone të tjera, që do ta mbajë atë në këtë klub deri në vitin 2023.
Basketbollisti i njohur, që i dhuroi Lejkërsave titullin e parë në NBA pas një dhjetëvjeçari, është shpërblyer me një marrëveshje të re, të vlefshme plot 85 milionë dollarë.
Kjo marrëveshje do ta zgjasë epokën e Xhejmsit tek Lejkërsat në 5 sezone, më gjatë se periudhat e tij në Majemi Hiit apo Klivlend Kavaliirs.
Los Anxheles Lejkërs janë përsëri favoritë për ta fituar titullin në NBA me basketbollistin e famshëm në skuadër. LëBron Xhejms është basketbollisti i vetëm që e ka fituar Çmimin e Lojtarit më të Vlefshëm (MVP) në finale me 3 ekipe të ndryshme dhe ka siguruar edhe katër tituj “kampioni”.
Më datën 30 dhjetor 2020, i mbiquajturi “Mbreti Xhejms” do të festojë 36-vjetorin dhe veterani nga Ohio padyshim ka një kontribut të jashtëzakonshëm në fitimin e titullit të parë për Lejkërsat, pas një plot një dhjetëveçari. Basketbollisti nga Akroni ia doli mbanë për të kthyer trofeun “Lerrri O’Brajën” në këtë pjesë të Kalifornisë për herë të parë që nga viti 2010 dhe në tentativën e tij të dytë.
Sepse, siç dihet, në vitin e tij të parë me fanellën e “liqenorëve”, pra në sezonin 2018-2019, Los Anxheles Lejkërs dështuan për t’u kualifikuar për në fazën e “play-off”-it. Duke lënë mënjanë përfitimet e tjera nga imazhi apo sponsorizimet e ndryshme në mesin e vitit 2023, LëBron Xhejms do të prekë shumën e 435 milionë dollarëve, shifër që përfaqëson paratë e fituara nga 35-vjecari gjatë gjithë karrierës së tij të lavdishme.
Lejkërsat do ta fillojnë aventurën e tyre për mbrojtjen e titullit pikërisht në derbin e Qytetit të Los Anxhelesit me Klipërsat, me takimin hapës të sezonit 2020-2021 që do të zhvillohet në “Stejpëlls Senter” në datën 22 dhjetor 2020
