Liga e Evropës ka vijuar të enjten me ndeshjet e 5-ta në grupe dhe, duke nisur nga ora 21:00, janë zhvilluar 12 ndeshjet e mbetura të 6 prej grupeve, duke dhuruar plot gola të shënuar, mbi 3.3 gola për ndeshje.
Në takimet e grupit A Klujzhi dhe CSKA-ja e Sofies janë ndarë me rrjeta të paprekura, ndërsa Roma ka mundur Jang Bojs të Bernës me rezultatin 3-1, duke u shkëputur edhe më në krye të renditjes, tanimë në kuotën e 13 pikëve, teksa e ka siguruar më herët vendin në turin tjetër, atë të 32-shes. Ndërsa zviceranët dhe rumunët vijojnë betejën për biletën tjetër për më tej. Në grupin B, si Arsenali, ashtu edhe Molde kanë korrur fitore bindëse, përkatësisht 4-1 në Londër ndaj Rapidit të Vjenës dhe 3-1 ndaj Dandokut.
Dhe, kur ka mbetur edhe dy ndeshje për t’u luajtur Molde mbetet në rrugë të mbarë për të qenë ajo skuadra tjetër që do të shoqërojë Arsenalin në turin tjetër. Në grupin C, Bajer Leverkuseni dhe Sllavia e Pragës korrën fitore, përkatësisht 3-2 në fushë të huaj, ndaj Nisës dhe 3-0 në fushën e vet, ndaj Hapoel Biir Shevas. Ato ndajnë së bashku kreun e renditjes, me nga 12 pikë secila, 9 më tepër sesa dy skuadrat e tjera të grupit dhe sigurojnë kështu vendin në turin tjetër të Ligës së Evropës.
Kështu kanë bërë edhe në grupin D, Benfika dhe Gllasgou Rejnxhërs që kanë korrur fitore në fushën e vet, përkatësisht 4-0 në Portugali ndaj Leh Poznanit dhe 3-2 në Skoci ndaj Standardit të Liezhit. Kjo nënkupton se portugezët dhe skocezët ndajnë edhe kreun e renditjes, me nga 11 pikë, të paarritshëm tanimë nga dy skuadrat e tjera të grupit, teksa ka mbetur vetëm një ndeshje për t’u luajtur. Dhe, së fundmi, në grupin E, PSV-ja e Eind’hovenit ka korrur fitoren e 3-të, duke mundur 1-0 në Spanjë Granadën, ndërsa PAOK-u i Selanikut është 1-2 në fushë të huaj përballë Omonias së Nikozisë.
Spanjollët kryesojnë renditjen me 10 pikë, një më tepër sesa holandezët më tepër, ndërsa helenët kanë mbetur prapa dhe janë eliminuar tanimë bashkë me qipriotët.
Pa.Va/Fjala.al
