Periudha e Pol Pogbasë tek Mançester Junajtid ka marrë fund, sipas deklaratave të papritura të agjentit të tij, Mino Raiola. Francezi, i cili është përfolur vazhdimisht për kalimin tek Reali i Madridit ose për rikthimin tek Juventusi, po kalon një periudhë të vështirë kohët e fundit në “Olld Traford”.
Por, i cituar nga e përditshmja sportive italiane, “Tuttosport”, Raiola deklaroi se: “Mund të them që gjithçka ka marrë fund sa i përket qëndrimit të Pol Pogbasë tek Mançester Junajtid.” Raiola nuk sqaroi nëse Pogbaja do të largohet gjatë merkatos së janarit apo gjatë asaj të verës së ardhshme.
Pol Pogba u rikthye nga Juventusi tek gjigantja angleze në 2016-ën, për atë që ishte atëherë një rekord botëror sa i përket shitblerjes së një futbollisti, duke e ndihmuar Mançester Junajtid të fitonte trofeun e Ligës së Evropës dhe atë të Kupës së Ligës në sezonin e tij debutues nën drejtimin e ish-trajnerit Zhoze Murinjo.
Pa.Va/Fjala.al
