Ministri i Brendshëm në detyrë, Sandër Lleshaj dha sot dorëheqjen nga posti, ndërsa kjo lëvizje po komentohet më së shumti si urdhër i kryeministrit Edi Rama.
Në një lidhje me Skype për “Open”, Lleshaj mohoi kategorikisht se kjo ishte kërkesë e Ramës, madje habiti ndërsa tha se nëse do ja kishte kërkuar kryeministri, nuk do ta kishte dhënë dorëheqjen.
“Nuk besoj se do ta kisha dhënë po të ma kishte kërkuar. Vendimet e mi ai marr sipas pikëpmajeve të mia morale”, tha Lleshaj.
Ai mori këtë vendim pas vrasjes së të riut Klodian Rashës nga një polic dy ditë më parë, duke theksuar se motivi kishte qenë moral.
Ndërkohë, më herët për ‘Opinion’ ai tha se mes tij dhe kryeministrit nuk ka patur kurrë raporte të ngrohta me Ramën.
“Nuk jam një person që hiqem qafe lehtësisht. Nuk kam patur marrëdhënie të ngrohta me kryeministrin dhe nuk mbaj marrëdhënie të ngrohta me shumë njerëz. Kam patur një marrëdhënie profesionale, korrekte. Është marrëdhënie intelektuale, profesionale, njerëzore dhe është një model shumë i mirë i raportit mes Ministrit të Brendshëm dhe Kryeministrit të një vendi. Një marrëdhënie krejt profesionale, e pacenuar nga asnjë lloj raporti tjetër.”, pohoi Lleshaj.
Pa.Va/Fjala.al
