Një shtetas palestinez me iniciale M.B, 32 vjeç është arrestuar nga policia, pasi ka plagosur një taksist në Durrës dy ditë më parë.
Mësohet se autori palestinez ka hyrë klandestin në vendin tonë për të kaluar më pas në Itali.
Nga Tirana, palestinezi ka marrë një taksi për të shkuar në Durrës, saktësisht me destinacion Fllakën.
Kur ka mbërritur në Fllakë, ai ka nxjerrë një thikë dhe ja ka vendosur taksistit në fyt e i ka kërkuar të zbresë dhe t’ia dorëzojë atij makinën.
Shoferi i taksisë nuk i është bindur dhe është përleshur me palestinezin. Në përleshje e sipër palestinezi e ka goditur 2 herë me thikë taksistin duke i shkaktuar plagë në dorë. Më pas është larguar nga vendi i ngjarjes.
Fill pas kësaj taksisti ka njoftuar policinë. Policia e Shijakut ka ngritur shërbime në bazë të përshkrimit të tipareve, trupit dhe moshës dhe ka arritur ta kapë e ta prangosë palestinezin. Ai u gjet në një rrugë dytësore në Rrashbull të Durrësit.
‘Specialistët për Hetimin e Krimeve në Komisariatin e Policisë Shijak arrestuan në flagrancë, për veprën penale “Vjedhja me dhunë” e mbetur tentativë, shtetasin palestinez M. B., 23 vjeç, pasi në datën 13.02.2021, në Fllakë, Shijak, ka goditur me mjet prerës (thikë) në dorë, shtetasin D. M., 40 vjeç, banues në Tiranë, me qëllim për t’i vjedhur mjetin taksi me të cilin po udhëtonte nga Tirana në drejtim të Durrësit,-‘ njoftoi policia.
