Pa ilaçe ose vaksina, qeveria e Tanzanisë propozon ilaçe natyrore të bazuara në bimë kundër covidit dhe kjo vetëm sepse sipas saj virusi është “shkatërrues” në vendet fqinje.
Pasi pa një rritje të parë të rasteve gjatë valës së parë të infeksionit, Presidenti i Tanzanisë John Magufuli papritmas vendosi të ndalojë numërimin e rasteve majin e kaluar dhe një muaj më vonë deklaroi se kombi kishte eleminuar virusin pas tre ditësh agjërimi dhe lutjesh.
Ndërsa bota po përpiqet të çlirohet nga pandemia e koronavirusit dhe është përballur me një valë të re infeksionesh, qeveria mohuese e Tanzanisë ka miratuar një rrugë të vetën, jo vetëm duke injoruar çdo lloj bllokimi të mundshëm dhe çdo rregull anti-covid, por gjithashtu duke mohuar drejtpërdrejt ekzistencën e virusit në vendin ku tamponët dhe testet nuk kryhen as tek pacientët.
Një politikë e kryer edhe sot nga vetë Presidenti por edhe nga e gjithë qeveria. Pra, asnjë detyrim për të vendosur maskë apo distancë dhe madje duke shkuar më tej edhe frekuentimin e diskotekave dhe klubeve për turistët nga e gjithë bota.
Vetë Ministrja e Shëndetësisë Dorothy Gwajima erdhi në konferencën për shtyp duke lavdëruar aftësitë e mrekullueshme kundër të këqijave të tjera të një kure të bazuar në xhenxhefil, qepë, limon dhe piper që ajo vetë tregoi se si të përgatitej.
“Ne kemi nevojë për të përmirësuar higjienën tonë personale, të lajmë duart me ujë të rrjedhshëm dhe sapun, të përdorim shami, të ushtrohemi, të hamë ushqime të shëndetshme, të pimë shumë ujë dhe të përdorim mjete shëruese natyrore me të cilat kombi ynë është i pasur”, tha Gwajima duke theksuar se aty nuk ekziston virusi, por ai po “shkatërron” vendet fqinje.
Pavarësisht zgjedhjes së qeverisë në vend, alarmi përballë virusit rritet gjithnjë e më shumë edhe nëse pa numra të caktuar nuk dihet se çfarë po ndodh në frontin e pandemisë.
Midis atyre që kanë sfiduar haptazi autoritetet lokale është Konferenca e Peshkopëve në Tanzani, duke paralajmëruar se funeralet janë rritur ndjeshëm në zonat urbane, një simptomë e mundshme që virusi po qarkullon dhe po shkakton viktima.
“Ne dikur kremtonim një ose dy funerale në javë në famullitë e qytetit, tani shërbejmë çdo ditë”, u shprehën ata.
