Një shtetas shqiptar që ndodhet i bllokuar në Wuhan të Kinës, epiqendra e koronavirusit vdekjeprurës, pritet të evakuohet nga autoritetet turke. Turqia do të dërgojë atje një avion mallrash për të larguar shtetasit e saj, ndërkohë që ka marrë përsipër edhe evakuimin e qytetarëve të vendeve të afërta.
Përveç 34 turqve dhe shqiptarit, në të njëjtin avion do të merren edhe shtatë shtetas të Gjeorgjisë dhe shtatë të Azerbajxhanit, pasi t’i jenë nënshtruar kontrolleve të hollësishme shëndetësore në kushte të karantinës.
Në bordin e avionit turk do të udhëtojë edhe personeli shëndetësor me përvojë me sëmundjet infektive.
170 është numri i viktimave si pasojë e koronavirusit, ndërsa mbi 7.700 të tjerë janë infektuar. Përveç Kinës, virusi është shfaqur edhe në disa shtete të Azisë, si dhe në Francë e Gjermani.
