Një transplant i rrallë është kryer në Maqedoninë e Veriut duke i shpëtuar jetën një 22-vjeçari.
Ministri i Shëndetësisë, Venko Filipçe me në të një postimi në rrjetet sociale ka njoftuar se punonjësit shëndetësorë për të dytën herë në historinë e Maqedonisë së Veriut kanë kryer transplantimin e zemrës.
Bëhet fjalë për një djalë 22 vjeçar, të cilit i është transplantuar zemra e një vajze e cila ka humbur jetën tragjikisht, familja e të cilës ka dhuruar organet.
“Në ora 3:33 të mëngjesit të sotëm, tek një djalë 22-vjeçar janë dëgjuar rrahje të një zemre të re, të dhuruar! Ky është transplantimi i dytë i zemrës i kryer në historinë e vendit, në Klinikën e Kardio-kirurgjisë . Urime të gjithë kolegëve dhe faleminderit gjithë ekipit që punoi pa u lodhur gjatë gjithë natës! Ky është një sukses i madh i kujdesit shëndetësor maqedonas, që nuk do të ishte e mundur pa pëlqimin për dhurimin e organeve nga familja e pacientes së re që humbi jetën e saj para kohe. Jam krenar për kolegët e mi!”, shkruan Filipçe.
“Jeta e saj e re u shua tragjikisht, por zemra e saj shpëtoi një tjetër jetë të re. Nuk ka fjalë për të shprehur mirënjohjen ndaj familjes. Nuk ka fjalë për të përshkruar madhësinë e aktit,” shkruan në një tjetër postim ministri.
