Policia e Shtetit ka shpërndarë një njoftim për median për dy nga shqiptarët më të kërkuar.
Nga të dhënat mësohet se dy më të kërkuarit janë dënuar me burgim të përjetshëm.
Një nga të kërkuarit është Gleron Jahjolli, i cili në datën 23 tetor 2001, në dalje të fshatit Menkulas, Devoll, në bashkëpunim me shtetasin E. J., ka qëlluar me breshëri automatiku në drejtim të një automjeti, brenda të cilit ndodheshin 3 shtetas, konkretisht shtetasi A. N. (drejtuesi i mjetit, i cili mbeti i vdekur) dhe pasagjerë shtetasit J. K. dhe R. N.
Gleron Jahjolli është dënuar me burgim të përjetshëm nga Gjykata e Rrethit Gjyqësor Korçë, për veprat penale “Vrasja në rrethana cilësuese kundër dy ose më shumë personave, kryer në bashkëpunim” dhe “Armëmbajtja pa leje”.
I dënuari tjetër me burg përjetë është shtetasi Fran Prendi, që në datën 9 mars 1992, në vendin e quajtur “Rezervuari i qytetit”, Pukë, shtetasi Fran Prendi ka vrarë për motive të dobëta shtetasin H. B.
Shtetasi Fran Prendi është dënuar me burgim të përjetshëm nga Gjykata e Rrethit Gjyqësor Pukë, për veprën penale “Vrasja me dashje, për motive të dobëta”. /Fjala.al
