Më shumë se 800 naftëtarë të uzinës së Ballshit kërcënojnë për grevë urie sepse kanë katër muaj pa marrë pagat. Ata kanë bllokuar punën në uzinë dhe kërkojnë zgjidhje për situatën në të cilën ndodhen.
Naftëtarët po përjetojnë ditët e tyre më të vështira. Ata janë shprehur se ushqimet po i blejnë me listë dhe fëmijët i kanë hequr nga shkolla.
Këtë të hënë ata kanë dalë me pankarta duke protestuar para prefekturës së Fierit.
Kërkuan pagat, sigurimet dhe dhanë alarmin për rrezikshmërinë që paraqet uzina si pasojë e mosmirëmbajtjes.
“Kush do t’i marrë në dorë fatet e kësaj rafinerie në këto kushte teknike aktualisht.”
“Me këtë privatizim ka dalë me humbje, është privatizim me humbje.”
Thonë se ndjehen të braktisur nga qeveria dhe në rast se nuk ndërhyhet për një zgjidhje të shpejtë, paralajmërojnë grevë urie.
“Greva e urisë, o ta fikin fare atë rafinerinë, ose ta ndezin njëherë e mirë.”
Rafineria e Ballshit u mbyll në muajin shtator për shkak të mos furnizimit me naftë bruto nga Bankers Petroleum.
