Austria ka fituar me rezultatin minimal 1-0 në ‘Arena Națională’ të Bukureshtit kundër Ukrainës.
Ka mjaftuar një gol i mesfushorit të Hoffenheim, Baumgartner në pjesën e parë që Austria të sigurojë kualifikimin dhe ta mbyllë grupin C në vend të dytë pas Holandës. Baumgartner i shërbyer nga kapiteni Alaba, i dha avantazhin në minutën e 21 skuadrës së Franco Fodës. Ukrainasit të udhëhequr nga ylli i Atalantës, Malinovsky, nuk ishin në lartësinë e duhur për të marrë një rezultat pozitiv që do tu jepte kualifikimin.
Me këtë fitore, skuadra austriake rezervon përballjen me Italinë në raundin tjetër, ndeshje e cila do të luhet ditën e shtunë në stadiumin e Wembley në Londër.
Ndërkohë, skuadra e Shevchenkos mban ende gjallë shpresat për kualifikim si e treta më e mirë me 3 pikët e vlefshme të marra kundër Maqedonisë në ndeshjen e dytë të fazës në grupe.
